 |
| Workouts |
التمارين الرياضية | تعرف علي انواع و كثافة التمارين الرياضية.
في خطواتك الاولي لممارسة الرياضة لازم تحدد هدفك و تتمرن بالاسلوب اللي يحققلك هدفك.
عشان كده لازم تعرف انواع التمارين الرياضية و ازاي تتمرن التمرين المناسب لتحقيق هدفك.
انواع التمارين الرياضية
التمارين الرياضية عبارة عن ٣ انواع واول حاجة لازم تحسب القوة القصوي لعضلات جسمك زي ما شرحنا قبل كده لان ده هيفيدك في تحديد نوع التمرين المناسب.
١-تمارين التضخيم وزيادة الكتلة
النوع ده من التمرين بيكون هدفه تكبير العضلات بغض النظر عن زيادة قوتها او تحملها .
ومن امثلتها كمال الاجسام بيكون باستعمال وزن يتراوح بين ٧٠%الي٨٠%من القوة القصوي للعضلة لمدة من ٨ الي ١٢ عدة في المجموعة الواحدة بتتمرن من ٣ الي ٥ مجموعات للعضلة المستهدفة.
مثلا اذا كنت بتعد عدة واحدة فقط ب ١٠٠ كيلو جرام محتاج تلعب مثلا ب٧٥ كيلو جرام ١٠ عدات في المجموعة الواحدة
٢-تمارين رفع القوي القصوي
تمارين التقوية بتعلي الوزن اللي تقدر تشيله بعد كده في حالة رفع قوة العضلة ، وده بيحتاجه جدا مثلا في رفع الاثقال او العاب القوى.
بيكون الوزن المستخدم في التمرين حوالي ٩٠% من القوة القصوي لمدة من ٢ الي ٥ عدة في المجموعة الواحدة من ٣ الي ٥ مجموعات.
يعني علي المثال السابق هتحتاج تتمرن ب٩٠ كيلو حوالي ٣ عدات في المجموعة الواحدة لو بتعد عدة واحدة فقط ب ١٠٠ كيلو في المجموعة
٣-تمارين رفع التحمل العضلي
تمارين التحمل مختلفة شوية بتتمرن ب ٥٠%الي٦٠% من القوة القصوي للعضلة لمده من ١٢ الي ٢٠ عدة في المجموعة الواحدة بس بتكتفي بمجوعة واحدة او ٢ بالكتير للعضلة المستهدفة و ده بيزود من مدة تحمل العضلة لممارسة نشاطها.
وده بيفيد مثلا في السباحة و الجري
شدة و كثافة التمارين الرياضية
معرفة نوع جسمك هتفيدك عشان تحدد الشدة المناسبة لنوعية التمرين المناسب ، لان ممارسة التمرين بصورة صحيحة و مناسبة من اهم عوامل نجاحك في الوصول لهدفك.
هناك ٣ مستويات تحدد شدة و كثافة تمرينك
١-عالي الحدة
بيكون مدة الراحة بين المجموعات قليل جدا من ٣٠ الي ٤٥ ثانية بين المجموعات ، عشان تحافظ علي معدل ارتفاع نبضات القلب.
ده بيكون مفيد جدا لمعدلات حرق السعرات الحرارية ، علي سبيل المثال الناس اللي بتخسس او بتنشف الدهون هيكون اغلب تمريناتها مرتفعة الحدة
٢-متوسط الحدة
مدة الراحة بين المجموعات بيكون من ٤٥ ثانية الي دقيقتين وده مفيد و مريح ، خاصة لو مش بتنشف.
و في نفس الوقت مش حابب انك تنهج و تعرق كتير لان معدلات ارتفاع النبض مش بيكون عالي
٣-منخفض الحدة
هنا بقي لازم الراحة بين المجموعات مش اقل من دقيقتين.
ده بيكون مفيد جدا لو انت بتضخم مثلا لان العضلة في الفترة دي بتستشفي بالكامل بين المجموعات وده بيرفع مستوي كفاءة المجموعة التالية.
بالتوفيق ان شاء الله.
قد يعجبك احدي موضوعاتنا الاخرى:
إرسال تعليق
اترك تعليقا لدعمنا او للاستفسار او لاقتراح مواضيع