اثناء النوم الوظائف الحيوية للجسم بتكون في اعلي نشاطها سواء حرق دهون او بناء عضلات بس ده في حالة توفر شروط النوم الجيد و في الوقت المناسب للنوم زي ما هنتعلم.
الساعة البيولوجية
مهم جدا تعرف ان الغدد في جسمك بتفرز هرمونات مختلفة في اوقات مختلفة في هرمونات مسئولة عن تخزين الدهون و هرمونات مسئولة عن بناء العضلات و غيرها كتير.
لازم تستغل المده اللي بيكون افراز هرمون النمو عالي فيها و تكون نايم.
افضل مواعيد النوم
اعلي معدلات لافراز هرمون النمو و هو الاهم لبناء العضلات بيكون من الساعة ١١ مساءا تقريبا للساعة ٢ صباحا وده وقت لازم تستغله في النوم لتحقيق افضل النتائج.
شروط النوم الجيد:
النوم الجيد له عدة شروط لازم تتبعها عشان تحصل علي افضل نتيجة.
-لازم يكون من٦ الي٨ ساعات يوميا بمعدل ٣٥ ساعة اسبوعي.
-ضروري يكون المكان مظلم علي قد ما تقدر.
-مهم برضه يكون متواصل عشان توصل لمرحلة النوم العميق.
-حاول استغلال افرازات الهرمونات المناسبة يعني يكون النوم مساءا.
لو توفرت الشروط دي في نومك تقدر تقول (انا بنام كويس).
اضرار النوم السيئ:
زي ما النوم الجيد ليه فوائد كتير قلة جودة و وقت النوم له اضرار لا تحصي مباشرة و غير مباشرة مؤثرة علي كل العمليات الحيوية و كفاءتها.
-ضعف التركيز و الذاكرة و وظائف عدة للجهاز العصبي.
-ضعف عضلي ملحوظ و بطئ في الاستشفاء العضلي وده ممكن يعطل الرياضين عن الوصول لهدف معين او رفع القوة القصوي للعضلات.
-بطئ في حرق الدهون نتيجة انخفاض معدلات التمثيل الغذائي وده برضه هيعطلك جدا لو بتخسس او بتنشف الدهون.
كتير من الوظائف الحيوية للجسم و المخ بتختل باختلال نظام النوم لدي الاشخاص لذلك ينصح دائما بالنوم العميق مساءا لمدة ٧ ساعات في المتوسط.
بالتوفيق ان شاء الله.
إرسال تعليق
اترك تعليقا لدعمنا او للاستفسار او لاقتراح مواضيع